Policia suedeze ka arrestuar një person që dyshohet se ishte spiun i Rusisë. I arrestuari, emri i të cilit nuk është bërë i ditur, ishte punonjës në një kompani teknologjie në Stokholm.
Shefi i kundër-zbulimit të Suedisë, Daniel Stenling tha se personi i arrestuar besohet të jetë rekrutuar nga një oficer i Inteligjencës ruse i cili ishte paraqitur si diplomat. Dyshohet se aktiviteti i spiunit rus ka vazhduar që prej vitit 2017. Ai u arrestua në një restorant gjatë kohës që ishte duke ngrënë drekë. Një dëshmitar ka thënë për një gazetë suedeze se disa oficerë policie, të njohur si skuadra Sapo, sulmuan restorantin dhe rrethuan tavolinën ku i dyshuari po drekonte me një person tjetër.
BBC raporton se personi i dytë u arrestua gjithashtu, por më pas u lirua pasi ka imunitet diplomatik. Vitin e kaluar, kreu i Shërbimit të Sigurisë Suedeze tha për BBC se është gjithmonë e në rritje ndërhyrja politike e vendeve të tjera në Suedi, duke iu referuar Rusisë, e cila aktualisht konsiderohet si kërcënimi më i madh për shtetin nordik.