Një sondazh i kryer kohët e fundit në Shqipëri me 1200 pjesëmarrës të moshave të ndryshme, ka nxjerrë se të paktën 30 për qind e tyre kanë deklaruar se nuk duan ta bëjnë vaksinën kundër Covid-19.
Sondazhi është realizuar nga një grup studimor në Universitetin Zoja e Këshillit të Mirë në Tiranë.
Mësohet se në sondazh morën pjesë 1.200 shtetas shqiptarë banorë të Tiranës dhe qyteteve të tjera dhe të moshave të ndryshme, mbi 18 vjeç.
Ndër të pyeturit, 30 për qind e tyre kanë deklaruar se ata nuk pranojnë të marrin vaksinën për koronavirusin.
Rezultati i këtij sondazhi nuk ndikohet nga zhvillimet e fundit me Astrazeneca sepse pyetësori është plotësuar në periudhën fundi i janarit dhe fillimi i shkurtit.
Zyrtarisht thuhet se vaksina për Covid-19 nuk është e detyrueshme. Megjithatë shumë po flitet në BE për ndalim të lëvizjes jashtë shtetit duke paralajmëruar se do tu kërkohet dokumentim i marrjes së vaksinës.
Në Shqipëri, autoritetet kanë hapur një seksion të posaçëm online që pajis personat e vaksinuar me pasaportë vaksinimi.