Sopranoja e njohur shqiptare, Ermonela Jaho, ishte e ftuar në emisionin “Log”, ku ndau pasionin dhe përvojat e saj me operën.
“E ndjej veten shumë afër italishtes, jam dashuruar me operën italiane. Por edhe me atë franceze, kam kënduar edhe në gjermanisht dhe rusisht, megjithatë më shumë qëndroj te shpirti mesdhetar,” tha Jaho.
Ajo theksoi diferencat midis stileve operistike: “Opera italiane është më e drejtpërdrejtë, ndërsa ajo franceze është më romantike dhe nuk jep atë dramën si ajo italiane. Gjithsesi, të dyja janë pjesë e rrugëtimit tim artistik.”
Sopranoja shqiptare e konsideron karrierën e saj si një ëndërr që ka nisur që në fëmijëri dhe e gëzon çdo ditë: “Për mua është një ëndërr që ka filluar që e vogël dhe e shijoj tani përditë. Nuk e krahasoj veten me askënd, kërkoj të bëj më të mirën, por më bën shumë qejf që jam ndër 6 sopranot më të mira në botë.”