Kjo e mërkurë është cilësuar nga sinoptikanët si dita më e nxehtë e vitit në vend, me temperaturat që pritet të arrijnë deri në 42 gradë Celsius.
Agjencia për Media dhe Informim u ka bërë thirrje qytetarëve të tregojnë kujdes të shtuar për shkak të temperaturave të larta. Përmes një postimi në rrjetet sociale, qytetarëve u këshillohet të shmangin daljet në orët e pikut, të konsumojnë sa më shumë ujë dhe të qëndrojnë në ambiente të freskëta.
Vëmendje e veçantë kërkohet për fëmijët dhe të moshuarit, ndërsa kujdes duhet treguar edhe për kafshët.
Për të përballuar më mirë të nxehtin:
- Pini ujë shpesh, edhe nëse nuk ndjeni etje.
- Shmangni ekspozimin në diell dhe aktivitetin fizik në orët më të nxehta.
- Vishuni lehtë, me rroba të lirshme dhe me ngjyra të çelëta.
- Qëndroni në ambiente të freskëta dhe mbani sa më të freskëta hapësirat e banimit.
- Kujdesuni veçanërisht për fëmijët dhe të moshuarit.
- Mos lini fëmijë apo persona të tjerë në automjete të parkuara, edhe për pak minuta.
- Mos harroni kafshët, duke u siguruar ujë të freskët dhe një hapësirë me hije.
Për qytetarët që kanë shqetësime për shkak të temperaturave të larta, këshillohet konsultimi me mjekun e familjes.
“Nëse ndiheni të dobët, të marramendur, të konfuzuar ose me simptoma të tjera nga i nxehti, kërkoni ndihmë mjekësore. Sot, më shumë se çdo ditë tjetër, kujdesemi për veten dhe për njëri-tjetrin”, thuhet në njoftimin e Agjencisë për Media dhe Informim.