Çështja e CEZ është rikthyer sërish në vëmendje, teksa SPAK ka marrë sot në pyetje ish-biznesmenin Kastriot Ismailaj. Nga sa ëshë mundur të mësohet, ai u shoqërua nga burgu i Fierit për në ambientet e prokurorisë së Posaçme.
Dëshmia e biznesmenit është marrë nga prokurori Altin Dumani, ndërsa pas përfundimit të saj Ismailja u shoqërua mbrapsht për në qelinë e burgut në Fier.
Burime thonë se gjatë marrjes në pyetje nga Prokuroria e Posaçme Anti Korrupsion, ai u pyet për disa udhëtime jashtë vendit.
Kujtojmë se ish-biznesmeni, Kastriot Ismailaj u dënua në vitin 2017 me 11 vite burg për mashtrim me pasoja të rënda dhe “pastrim të produkteve të veprës penale”. Gjykata ka urdhëruar edhe sekuestrimin e 5 milionë eurove. Ai ishte administrator i kompanisë DIA, e ngarkuar për mbledhjen e borxheve të CEZ, ku u përfshi në një skemë mashtrimi, duke shkatërruar edhe raportet mes shtetit shqiptar dhe CEZ, me kosto të madhe për buxhetin e shtetit.
Ai u arrestua në 12 maj të vitit 2015 nga Sektori i Pastrimit të Parave dhe ai i Krimit Ekonomik dhe Financiar ne Policinë e Shtetit.