Numri i të vdekurve në Spanjë është rritur me 394 në 24 orët e fundit, afro 30% më shumë duke e çuar totalin në 1 720 viktima që prej fillimit të pandemisë së koronavirusit, njoftoi sot Ministria spanjolle e Shëndetësisë.
Numri i rasteve të konfirmuara u rrit me 3 646 duke shkuar në 28 572.
Deri tani, 2 575 pacientë janë deklaruar të kuruar, por 1 785 persona janë ende nën kujdes intensiv.
Kryeministri spanjoll, Pedro Sanchez e lavdëroi dje kombin, një javë pasi qeveria shpalli gjendjen e jashtëzakonshme, dhe u bëri thirrje qytetarëve që të vazhdonin qëndresën ndaj pandemisë COVID-19, pasi më e keqja nuk kishte mbërritur ende.
Vendi është në mes të një bllokimi 15-ditor, të vendosur për të ndihmuar në ndalimin e përhapjes së sëmundjes.
Autoritetet shpresojnë se infeksionet së shpejti do të arrijnë kulmin, por ekziston gjithashtu një shans që qeveria të mund të zgjasë bllokimin për të ndihmuar kontrollin e sëmundjes.