Avokati i njohur Spartak Ngjela beson se Arben Ahmetaj do të kthehet vetë në Shqipëri, për t’u ballafaquar me akuzat që SPAK ka ngritur ndaj tij.
Ngjela tha se Ahmetaj është jurist, ndaj e kupton shumë mirë se ballafaqimi dhe mbrojtja e tij përballë drejtësisë nuk mund të bëhet “në mungesë” të tij.
Sipas Ngjelës, kthimi i Ahmetajt mund të ketë qenë arsyeja pse socialistët kanë kërkuar që heqja e imunitetit të tij të shtyhet për të hënën, me shpresën se ai do të kthehet vetë.
“Kam përshtypjen që do të kthehet ai. Domethënë, socialistët dhe Rama ka dashur kohë që të kthehet Ahmetaj.
Pse e donin me çdo kusht të hënën? Si e premtja, si e hëna për socialistët është e njëjta gjë. Mos ndoshta po prisnin që të kthehet Ahmetaj? Nuk e di, duhet të presin ta shikojmë.
Ai sipas të dhënave të mia është në Kanada. Nuk ka marrëveshje ekstradimi me Kanadanë. Ky mund të dënohet edhe 7-8 vjet. Por nuk ka rëndësi sa do dënohet, rëndësi ka si do të bëhet mbrojtja.
Nëse nuk je prezent në gjykatë, nuk ke mbrojtje të fortë. E ka të detyrueshme për fatin e tij të jetë në gjykatë. Nuk mund të jetë në mungesë. Ai vetë është jurist, si mund të rrijë jashtë? Është një pikëpyetje e madhe”, tha Ngjela në emisionin “Frontline”.