Avokati i njohur Spartak Ngjela ka komentuar situatën politike në vend, ku opozita jo parlamentare paralajmërojnë zgjedhje të parakohshme. Sipas tij nuk do të ketë zgjedhje të parakohshme pasi prishet reforma në drejtësi.
“Nuk mund të ketë zgjedhje të parakohshme sepse prishet sistemi. Politika amerikane nuk pranon zgjedhje të parakohshme. Pse nuk e pranon politika amerikane as gjermane? Nëse do kemi zgjedhje të parakohshme, shtyhet reforma në drejtësi. Nuk mund të ketë reformë në fushatë elektorale. Palët janë në fushatë elektorale, si do bëhet reforma? Nuk ka zgjedhje të parakohshme, merreni kapelen dhe vëreni në sy. Ti dhashë arsyet pse. Prishet reforma në drejtësi dhe nëse me largimin nga parlamenti dhe dorëzimin e mandateve për zgjedhje të parakohshme nuk mund të bëhen se hapet preçedent shumë i rrezikshëm. Nuk e pranon demokracia atë. Përkundrazi demokracia amerikane thotë largimi nga parlamenti është tradhti ndaj popullit. Doktrina amerikane është kjo, largimi nga parlamenti i atyre që ka zgjedhur populli, është tradhti ndaj zgjedhësve të vet,” tha Ngjela në Ora News.