Izet Shulku është një dibran i veçantë. Merret me gatime, me alipinizëm, turizëm, arkitekturë, vizita jashtë vendit, etj. “Aventurat” janë pjesë e jetës së këtij malësori të rrallë, energjik, bujar, i zgjuar, patriot. Ai zhytet i zhveshur në dëborë, lahet në ujë me akull, ngjitet në malet e larta të krahinës, në një farë mënyre bën gjithçka. Në një restorant të ngritur në vendlindje pret mysafirë të ndryshëm, shqiptarë e të huaj. I pret turistët me kulture dhe buzagaz. Gatuan si rrallëkush, sidomos prodhimet bio të zonës së begatë të Dibrës.
-Çfarë ju pelqen të bëni në jetën e përditshme?- e pyetëm Shulkun. Dhe përgjigja ishte se atij i pëlqejnë shëtitjet e shumta në natyrë, sidomos në alpet e Dibrës. Palestra, vrapimi në mëngjes dhe bisedat me mysafirë janë “ushqimi” i përditshëm i dibranit plot pasione e dëshira. Ai shpenzon shumë kohë si një familjar i devotshëm. Miqtë dhe bashkëqytetarët janë të shumtë dhe Izet Shulku i respekton pa fund.
“Ngjitjet në malin e Korabit, zhytjet në dëborë dhe akull, larja në ujin e ftohtë, në temperature mjaft të ulëta janë disa nga “aventurat” e mija. Trupi im është tashmë i përgatitur dhe i përballon këto veprime që jo kushdo mund t’i realizojë”, thotë Shulku për Tirana News.
Shulku nuk ka vizituar vetëm perlat e Shqipërisë, nga Veriu në Jug, por ai ka udhëtuar dhe është mahnitur me bukuritë e Kinës, Dubait, Egjiptit, Gjermanisë, Francës, Zvicrës, Turqisë, Greqisë, Italisë, Kosovës, Maqedonisë së Veriut, etj. Ruan mbresa të veçanta për mikpritjen, infrastrukturën, arkitekturën, sigurinë që këto shtete u japin qytetarëve dhe turistëve.
“Pranvera nuk vjen vetëm me një lule”, thonë një shprehje e urtë e Dibrës. Unë u sugjeroj bashkëqytetarëve të mos largohen nga këto vise të bukura, të bekuara. Edhe ato që kanë emigruar duhet të kthehen të vendin e tyre. Dibra dhe e gjithë Shqipëria është e bukur. Janë të gjitha mundësitë për të zhvilluar turizmin. Sëbashku mund të bëjmë gjëra të mira”, shprehet Izet Shulku.
