Stefi Prifti ka folur në një intervistë për familjen, divorcin e prindërve, mungesën e babait, humbjen e bashkëshortes dhe emigracionin.
Teksa ishte i ftuar në “S’e luan Topi”, Stefi tha se kur emigroi në Greqi në vitin 1991, si të gjithë shqiptarët edhe ai është detyruar të bëjë punë të ndryshme për të mbijetuar.
“Emigracioni, momenti i parë ishte edhe i çuditshëm dhe i vështirë. Ndonjëherë duhet edhe një fije fati dhe Endrin e kishim përcjellë pak muaj më parë. Endri kishte 6 muaj, ose më mirë të themi 5 sepse 1 muaj ndenji te kushërirat e mamasë si turist dhe e mbajtën ato në pëllëmbë të dorës. Më pas ne iu lutëm atyre që t’i gjenin një punë sepse bëhej fjalë për në 1991-shin. Dhe Endri kishte 5 muaj që punonte punë të ndryshme, punë krahu, çfarë t’i dilte para për të jetuar. Në momentin që shkova unë, edhe unë po t’i bësh bashkë të gjitha punët e mija, punova dy javë. Mund t’ju bëjë për të qeshur, por unë kam mbledhur domate dy herë dhe atë mbaj mend si punën fizike më të vështirë që kam bërë si burrë në Greqi. Ishte një punë që nuk e bënin burrat por gratë.”