Vetëm pak minuta më parë në emisionin “Shqipëria Live” në një lidhje të drejtpërdrejtë ishte reperi, Stresi. Aktualisht ai ndodhet i vetizoluar në Greqi bashkë me djemtë e tij të grupit. Ata kishin udhëtuar drejt shtetit fqinj para se situata e Koronavirusit të agravonte dhe qeveria të detyrohej të vendoste rregullat për parandalimin e infektimit të qytetarëve. I pyetur se si është gjendja aktualisht në Greqi, Stresi tha se akoma nuk është shpallur gjendja e jashtëzakonshme dhe qytetarët vazhdojnë normalisht jetën e tyre duke vazhduar me aktivitetet e përditshme. Gjithashtu ai bëri të ditur se do të vazhdojë qëndrimin e tij në Greqi derisa situata në Shqipëri të normalizohet. Një apel të fortë Stresi ka për të gjithë qytetarët shqiptarë. “Lejeni egon prej shqiptari, mos dilni mos e neglizhoni këtë lloj epidemie se nuk e keni idenë si përhapet. Që kshu respektojeni vendimin që shteti ka shpallur, respektojeni që t’ja dalim të gjithë së bashku”, tha Stresi në lidhjen live.
Edhe pse të izoluar Stresi bashkë me Flor Banën dhe djemtë po përpiqen ta shfrytëzojnë këtë kohë duke luajtur muzikë të mirë dhe duke krijuar projekte të reja.