BRITANI– Mjekët britanikë të cilët kaluan 102 ditë duke trajtuar një të mbijetuar nga kanceri për Covid-19 dokumentuan se si virusi pësoi mutacion pasi burri u trajtua me plazmë rikuperuese, raporton NDTV.
Studimi i rastit sugjeron që përdorimi i plazmës së gjakut të dhuruar nga të mbijetuarit e Covid-19 mund të ketë ushtruar presion të mjaftueshëm ndaj virusit për ta detyruar atë të evoluojë. Rezultati kishte më pak ndjeshmëri ndaj antitrupave të sistemit imunitar që normalisht luftojnë infeksionin, sipas raportit të botuar të Premten në revistën Nature.
Ndërsa plazma rikuperuese nuk dukej se dëmtonte pacientin, ajo nuk ofroi asnjë përfitim të qartë, tha Ravindra Gupta, një profesor i mikrobiologjisë klinike në Institutin e Imunologjisë Terapeutike dhe Sëmundjeve Infektive të Kembrixhit. Raporti gjithashtu sugjeron që mutacione të shumta mund të shfaqen në mesin e pacientëve të cilët kanë komprometuar sistemin imunitar dhe infeksionet kronike.
“Ndërkohë që virusi ka shancë të qëndrojë tek një person për një kohë të gjatë dhe replikohet për javë dhe muaj, atëherë mëson se si ta luftojë sistemin imunitar”- tha Gupta, duke shtuar se e gjitha ka të bëjë me presionin që i ushtrohet virusit.
Ai tha se trajtimi me plazma duhet të përdoret me kujdes tek njerëzit me sëmundje kronike të imunitetit. Raporti tregon gjithashtu se shumë mutacione mund të dalin tek pacientët që kanë sisteme të cënuara të imunitetit dhe infeksione kronike.
Pacienti nuk zhvilloi variantin e saktë që tani është bërë forma mbizotëruese e virusit që qarkullon në Mbretërinë e Bashkuar, tha raporti, por ai kishte disa elemente të përbashkëta.