Kryetari i PD-së, Sali Berisha i cilëson sulmet kibernetike nga irani, si akt zuzar ndërsa edhe në këtë rast gjen fajtor kryeministrin Edi Rama. Sipas Berishës, loja kriminale nisi prej Ramës me publikimin e të dhënave të qytetarëve. Një thirrje e ka dhe për SHBA e NATO, duke i kërkuar që të ndërhyjnë në mënyrë emergjente për të ndihmuar Shqipërinë në përballjen me sulmet kibernetike.
“Dënoj me ashpërsinë më të madhe sulmet që përfaqësojnë një dhunim të sovranitetit të vendit, një aggresion në një infrastrukturë me rëndësi kritike për shërbimet dhe sigurinë e cdo vendi. Duke theksuar këtë, dënoj pa hezitim qëndrimin e papërgjegjshëm, plotësisht të papërgjegjshëm të qeverisë së Edi Ramës.
Ai filloi zyrtarisht lojën kriminale në sistemet dixhitale të vendit duke nxjerrë për patronazhistët të dhënat personale, duke nxjerrë target në një mbështetje për krimin, duke nxjerrë rrogat në goditje për biznesin, duke nxjerrë telefonat, kartat e ID e kështu me radhë. Shtoj se për të gjitha këto akte të shtrira në vite, në Shqipëri nuk ka asnjë të dënuar, asnjë të dënuar apo të burgosur.
Dënoj tenderat korruptiv të ndërtimit dhe mbrojtjes së këtyre sistemeve. Përpjekje për të shkatërruar sistemet në Kosovë kanë qenë të mëdha, por mbrojtja e tyre ka qenë e shkëlqyer. I bëj thirrje NATO-s, SHBA me specialist të fushave të ndryshme të ndihmojnë Shqipërinë për të kapërcyer aggression. Partnerët tanë të bëjnë ndërhyrje emergjente se Irani nuk do të mund ta fitojë këtë betejë”.