Sulmet e Ukrainës ndaj infrastrukturës energjetike ruse kanë shkaktuar mungesa karburanti në disa rajone të Rusisë, duke rritur presionin ndaj Kremlinit.
Ministri i Jashtëm i Estonisë, Margus Tsahkna, deklaroi se edhe disa oligarkë rusë kanë nisur të shfaqin dyshime për vijimin e luftës në Ukrainë. Sipas tij, shumë prej atyre që më parë flisnin për një fitore të Rusisë, tashmë nuk besojnë më në këtë skenar.
Deklaratat vijnë në një kohë kur Ukraina ka intensifikuar sulmet me dronë ndaj rafinerive dhe objekteve të naftës në territorin rus. Sipas të dhënave të grupit analitik Rochan Consulting, që nga fillimi i vitit 2026 janë goditur dhjetëra objekte energjetike në Rusi.
Si pasojë e këtyre sulmeve, në disa rajone janë raportuar kufizime në furnizimin me karburant, ndërsa mediat vendase flasin për radhë të gjata në pikat e karburantit dhe përplasje mes qytetarëve.
Ministri estonez theksoi se Rusia mbetet një vend i rrezikshëm dhe se provokimet janë gjithmonë të mundshme. Megjithatë, ai vlerësoi se një sulm i madh ndaj vendeve anëtare të NATO-s në javët e ardhshme nuk duket i mundshëm për shkak të mungesës së burimeve ushtarake.
Ndërkohë, Ukraina ka bërë të ditur se do të vijojë sulmet ndaj objektivave ruse, me synimin për të shtuar presionin mbi Moskën dhe për ta detyruar Kremlinin të hyjë në negociata për përfundimin e luftës.
