Sot në orën 9:30, në Gjykatën Themelore të Prishtinës do të vijojë seanca gjyqësore ndaj tre të akuzuarve në kuadër të rastit të njohur si “Banjska”. Para trupit gjykues do të paraqiten sërish Blagoje Spasojeviç, Vladimir Toliç dhe Dushan Maksimoviç, të cilët akuzohen për përfshirje në sulmin e armatosur të ndodhur më 24 shtator 2023 në fshatin Banjskë, në komunën e Zveçanit.
Të akuzuarit përballen me akuza të rënda penale, që lidhen me organizimin dhe pjesëmarrjen në sulmin ndaj Policisë së Kosovës, një ngjarje që tronditi sigurinë në veri të vendit. Gjatë këtij sulmi, rreshteri Afrim Bunjaku humbi jetën në krye të detyrës, ndërsa disa zyrtarë të tjerë policorë mbetën të plagosur.
Sipas aktakuzës, sulmi ishte i mirëorganizuar, duke përfshirë përdorimin e armëve automatike dhe mjeteve të tjera luftarake. Prokuroria i konsideron të pandehurit pjesë të një grupi kriminal që synonte destabilizimin e rendit kushtetues dhe sfidimin e autoriteteve të sigurisë së Kosovës.
Seanca e sotme pritet të fokusohet në vazhdimin e shqyrtimit gjyqësor, paraqitjen e provave dhe dëgjimin e palëve, ndërsa procesi po ndiqet me vëmendje të shtuar nga opinioni publik dhe faktori ndërkombëtar, për shkak të ndjeshmërisë dhe peshës që ka ky rast për sigurinë dhe drejtësinë në vend.
Rasti “Banjska” lidhet me një nga incidentet më të rënda të sigurisë në Kosovë pas luftës, i ndodhur më 24 shtator 2023. Në atë ditë, një grup i armatosur sulmoi Policinë e Kosovës në veri të vendit, duke shkaktuar vdekjen e rreshterit Afrim Bunjaku, i cili u shpall Hero i Kosovës pas rënies në detyrë.
Ngjarja nxiti reagime të forta brenda dhe jashtë vendit, duke rritur presionin ndërkombëtar për hetim të plotë dhe vënien para drejtësisë të të gjithë personave përgjegjës. Autoritetet e Kosovës e kanë cilësuar sulmin si akt terrorist dhe pjesë të përpjekjeve për destabilizim të vendit, ndërsa procesi gjyqësor konsiderohet kyç për forcimin e sundimit të ligjit dhe dhënien e drejtësisë për viktimat dhe institucionet e sigurisë.