Java e 32-të e Abissnet Superiore do të hapet me supersfidën Kukësi-Partizani, e cla do të luhet në “Kukës Arena.”
Të dyja skuadrat ndodhen aktualisht me pikë të barabarta në klasifikim, teksa përballja e sotme pritet të jetë jo pak vendimtare për objektivat e tyre. Të dyja synojnë një vend në kupat e Europës dhe lufta për vendin e tretë është mjaft e fortë.
Për këtë takim, Longo është i gëzuar me gjendjen e tij tek Kukësi pasi ka gati 3 lojtarët titullarë që munguan ndaj Teutës. Feijao, Lulaj dhe Sh. Taipi kanë lënë pas pezullimin për shkak të kartonave, duke qenë gati për stafin teknik. Kujtojmë se Tafas dhe Shkurtaj nuk janë ende gati, ndërsa Puntus ka mbyllur sezonin.
Ndërsa nga kampi i demave, trajneri Dritan Mehmeti po ashtu ka rikthime të rëndësishme në skuadër, pasi tekniku i demave do ketë gati Muratajn dhe Malën. Murataj rikthehet pas pezullimit me kartona, teksa Mala pas një problem familjar.
Kukësi këtë ndeshje pret edhe mbështetjen e tifozëve të vet. Kundër Laçit stadiumi ishte plot, por ajo ishte ndeshja ku u inaugurua stadiumi dhe hyrja ishte falas.