Zv/kryeministri dhe ministri i Punëve të Jashtme dhe Bashkëpunimit Ndërkombëtar i Italisë, Antonio Tajani do të kryesojë sot në Farnesina, së bashku me kryeministrin Edi Rama, takimin e dytë në nivel politik të Komitetit të Përbashkët Ekonomik (KPE) Itali-Shqipëri..
”Me këtë takim synojmë të konfirmojmë nivelin e shkëlqyer të marrëdhënieve mes Romës dhe Tiranës. Shqipëria është një partnere strategjike e Italisë, me të cilën duam të forcojmë më tej bashkëpunimin”, tha Tajani duke ritheksuar se Ballkani Perëndimor përbën një zonë prioritare për politikën e jashtme italiane.
Italia është tregu i parë për mallrat shqiptare si edhe eksportuesja kryesore e Shqipërisë. Shkëmbimi tregtar u rrit me mbi 16% në vitin 2022 duke tejkaluar 3,3 miliardë euro. Punimet do të fokusohen në infrastrukturë, energji dhe agroindustri.
”Ne duam të konsolidojmë marrëdhëniet tona me Shqipërinë duke u fokusuar në forcimin e marrëdhënieve, në rrjetin e energjisë elektrike dhe zinxhirin e furnizimit bujqësor. Përvoja italiane do të kontribuojë konkretisht në planet e zhvillimit të qeverisë shqiptare”, përfundoi Tajani.