Me shumë vëmendje mediat në Shkup po pasqyrojnë takimin e thirrur në Tiranë nga kryeministri Edi Rama me krerët e partive politike shqiptare të Maqedonisë së Veriut.
Agjencia publike e lajmeve, MIA, raporton thirrjen e ministrit të Jashtëm, Bujar Osmani, që të mos krijohet ndonjë lloj konspiracioni pasi është një takim për vitin e ri, në të cilin do të shkëmbehen mendime për çështje aktuale në rajon.
Vëmendje të veçantë iu kushtua bojkotimit nga Lëvizja Besa. Lajmi i agjencisë MIA, që është publikuar edhe në media të tjera si Sitel, Kanal 5 dhe Nova Makedonija dhe shumë të tjera, përcjell akuzën e një deputeti të Lëvizjes Besa se nga takimi i Tiranës përfiton BDI, pasi kërkon të tejkalojë krizën brenda partisë.