Targat e përkohshme do të aplikohen tashmë online edhe për mjetet historike. Nëse keni një të tillë dhe dëshironi të merrni pjesë në evente dhe panaire për mjete të hershme apo me interes historik dhe koleksionimi tani keni mundësi të aplikoni në retro.al.
Një risi kjo për shumë të apasionuar që kanë mjete historike, por vuajnë pamundësinë e lëvizjes. Në këtë projekt të DPSHTRR-së, vendosni online të dhënat, si emër, mbiemër, klubi ku bëni pjesë, të dhënat teknike të mjetit, përshkrimin e lëvizjes se ku do të udhëtoni, eventi apo panairi. Ndërkaq, mund të specifikoni periudhën se sa ju nevojitet ky shërbim, vlefshmëria maksimale e të cilit është 30 ditë. Gjithashtu online zgjidhni edhe degën e DPSHTRR ku doni të tërhiqni targën e përkohshme dhe fletën e udhëtimit.
Ndër rregullat e caktuara është edhe ndalimi i daljes jashtë kufirit shqiptar me targë të përkohshme dhe qarkullimi lejohet vetëm për itinerarin e specifikuar.
Në përfundim të afatit të vlefshmërisë targa duhet të dorëzohet në Drejtorinë Rajonale ku është tërhequr.