Pavarësisht se vitin e kaluar, të ardhurat shënuan një nivel rekord duke kapërcyer dy miliardë eurot, deficiti shtetëror në Gjermani ka shënuar një rritje drastike në pothuajse 119 miliardë euro.
Qeveria gjermane regjistroi vitin e kaluar një nivel çuditërisht të lartë të borxhit shtetëror.
Sipas llogaritjeve paraprake të Entit Federal të Statistikave deficiti i shtetëror ishte 15 miliardë euro më shumë se në vitin 2023. Kjo do të thotë se në Gjermani deficiti i shtetit ishte më i lartë nga sa pritej.
Deficiti shtetëror tregon se sa i tejkalojnë shpenzimet e qeverisë federale, të tokave federale, të bashkive dhe të sigurimeve shoqërore të ardhurat, e mbledhura nga taksat apo tarifat e tjera.
Shteti gjerman ka shpenzuar pra shumë më tepër sesa të ardhurat që ka mbledhur – edhe pse të ardhurat në nivel federate, sipas statisticienëve për herë të parë kaluan “nivelin e dy miliardë eurove”.
Në krahasim me vitin 2023 të ardhurat u rritën me 4.8 për qind. Vetëm të ardhurat prej tatimeve u rritën me 3.5 për qind.
Tatimi mbi vlerën e shtuar u rrit me 2.4 për qind, ndërsa të ardhurat nga tatimi mbi të ardhurat u rritën me 3.6 për qind. Por rezulton se shpenzimet e qeverisë u rritën me 5.3 për qind krahasuar me një vit më parë. Përfitimet sociale monetare u rritën me 7.0 për qind.
Deficiti rezultoi kryesisht nga shpenzimet më të larta për pensionet. Shpenzime të mëdha janë bërë edhe për ndihmat sociale dhe ndihmat për kujdesin shëndetësor.