Ministri për Evropën dhe Punët e Jashtme, Ferit Hoxha, ka pritur në një takim një student nga Maqedonia e Veriut.
Përmes një postimi në rrjetin social “X”, ministri shprehet se me Mevlan Ademin ka zhvilluar një bisedë lidhur me të drejtat gjuhësore dhe angazhimet qytetare të të rinjve në vend. Ai shprehet se ka dëgjuar kërkesat e studentëve për respektimin e plotë të të drejtave për përdorimin e gjuhës amtare.
“Dëgjova me vëmendje kërkesat e tyre për respektimin e plotë të të drejtave për përdorimin e gjuhës amtare, në kuadër të zbatimit të qartë, të paekuivok dhe konsekuent të Marrëveshjes së Ohrit, si themel i barazisë dhe i funksionimit efektiv të shtetit në një shoqëri multietnike.
Një nga veçoritë themelore në demokraci është të dëgjohet zëri i rinisë dhe angazhimi qytetar për t’i përkthyer ato në politika konkrete që garantojnë barazi dhe standarde evropiane. Mbështetja për këto vlera është thelbësore në funksionimin dhe forcimin e institucioneve demokratike, dhe për një të ardhme më të mirë, më të drejtë, të bazuar në ligj dhe gjithëpërfshirëse”, shkruan ministri.
Ai e konsideron Ademin, si një nga studentët udhëheqës të manifestimeve paqësore në Republikën e Maqedonisë së Veriut, lidhur me të drejtat gjuhësore.
Ky takim vjen pas përfundimit të Samitit IV të Diasporës, të zhvilluar për tri ditë rresht në Tiranë, ku pati shumë panele diskutimi, edhe për gjuhën shqipe.