Këtë të dielë skuadra e Samuel Nikës do të luajë në “Liri Ballabani” ndeshjen e radhës me ekipin e njohur të Dinamos. Pikërisht javën e fundit skuadra kryeqytetase u ngjit në vendin e parë, aty ku qëndronte për disa javë skuadra e Burrelit.
Nika tha se ka bindur lojtarët se çdo ndeshje duhet konsideruar si finale, pasi vetëm me këtë moto mund të arrihet rezultati i dëshiruar. “Unë, tha Samuel Nikaj, u kam sugjeruar futbollistëve të kemi respekt për çdo kundërshtar por dhe të mos kemi frikë për ekip tjetër.”
Lidhur me deklaratën e drejtuesve të Dinamos se: “Burreli nuk është Barcelona”, tekniku burrelas nënvizoi se, “kjo më duket një batutë e momentit. Dua të them se kemi një skuadër me djem që kanë përvojë të gjatë, kanë energji të mjaftueshme për tu përballur me çdo ekip dhe nuk bien lehtë në kurthin e provokimeve të rivalëve.”
“Realisht, vijon Nikaj, unë dhe çdo futbollist i federuar jemi krenar dhe të përgjegjshëm që përfaqësojnë ekipin e Burrelit. Edhe pse nuk kemi historinë e Dinamos do të përpiqemi të jemi një kundërshtar i denjë dhe serioz.”