Kryeministri Edi Rama në daljen e tij të sotme me gazetarët, ka zgjedhur që të komentojë disa drejtime të qeverisjes, mes tyre dhe ndryshime të pritshme në policinë e shtetit.
Rama u shpreh se nuk mund të ketë punonjës policie mbi moshën 55-vjeçare, po nëse ata largohen nga puna, do të mbahen me një shpërblim financiar të konsiderueshëm.
“Nuk mund të ketë punonjës policie më shumë se 55 vjeç, po rrugëdalja duhet të jetë një shpërbim financiar”, u shpreh Rama, pa saktësuar se kur mund të hyjë në fuqi ku ndryshim.
Ndërkohë që kryeministri u shpreh se prej kohësh është duke u përgatitur një Forcë Speciale, e cila do të merret posaçërisht me të fortët e rrugëve, ku këta të fundit do ta kenë pothuajse të pamundur që të lëvizin lirshëm nëpër Shqipëri.
“Është bërë gati një forcë speciale që do të merret me të fortët e rrugëve, të lagjeve dhe të qyteteve, që do të jetë pjesë e presionit të policisë së shtetit kundër këtyre tipave, që nëse do të vendosin që të rrinë në Shqipëri, të përgatiten që të fshihen në vrima shumë shumë të ngushta, ndryshe nuk do të kenë mundësi që të marrin frymë”, tha më tej Rama.