Të martën pallati i Sportit “Farie Hoti” do të hapë dyert për politikën për të ndjekur rezultatin e një ndeshje që u mbyll me 11 maj, por që nuk pranohet nga Partia Demokratike.
Anëtarët e propozuar nga opozita në KQZ i dhanë dritën jeshile hapjes së 2 mijë e 240 kutive për t’i kaluar në një sitë të hollësishme verifikimi dhe rinumërimi.
96 kutitë e Elbasanit do të jenë të parat që do të hapen, por jo për tu rinumëruar, por për të hetuar nëse treni bullgar është ndaluar në stacionin e Gramshit dhe Peqinit me 11 maj siç pretendon opozita.
Pasi të mbyllet hetimi për qarkun e Elbasanit do nisë procesi maratonë i rinumërimit i të gjitha kutive të qarkut Tiranë dhe Fierit dhe 275 kutive te qarkut Durrës, ku fillimisht do të lexohet vota për partitë garuese e më pas në një raund të dytë do të numërohet vota e kandidatëve.