Kryeministri Edi Rama ka deklaruar ditën e sotme se do t’i dërgojë një notë verbale Serbisë për deklaratat e ministrit të Mbrojtjes, Aleksandar Vulin i cili akuzoi se Shqipëria “po tenton krijimin e Shqiperisë se madhe.”
“Ministria e Punëve të Jashtme shqiptare ka vazhduar procesin, ambasadori serb është thirrur ose do të thirret për të informuar shtetin serb se asnjë gojë e shfrenuar në qeverinë serbe nuk mund të dëmtojë qeverinë shqiptare ose figurën e ministrit apo kryeministrit shqiptar”, deklaroi Rama paraditen e sotme.
Kjo deklaratë e kreut të qeverisë nuk është pritur mirë nga Vulin, i cili nuk e ka kursyer një përgjigje.
“Kur ai mbeti pa argumente, Rama i bëri thirrje Ministrisë së Punëve të Jashtme për ndihmë. Asgjë e re, ishte kështu gjatë gjithë historisë deri në agresionin e NATO-s, dikush gjithmonë është duke thirrur për ndihmë dhe kundër serbëve. Le të kërkojë falje Rama për Shtëpinë e Verdhë, le të kërkojë falje për mbështetjen e vrasësve nga UÇK-ja dhe pastaj le të kërkojë që dikush të trajtojë kotësinë e tij të plagosur,” shtoi ai.
I gjithë ky debat me akuza të ashpra nga ana e ministrit serb vjen pas deklaratës së kryeministrit Rama në mbledhjen e përbashkët mes dy qeverisë, Shqipëri-Kosovë, se Porti i Durrësit do të jetë “de facto” port i Kosovës. Për Vulin, ky është një tregues se Rama po punon për krijimin e “Shqipërisë së Madhe”.