Disa nuk marrin atë që i takon të tjerë kërkojnë privilegje. Bëhet fjalë për ish punonjësit e sigurimit të shtetit dhe të përndjekurit politik gjatë viteve të diktaturës në Shqipëri.
31 vite pas rënies së regjimit 3.2 % e atyre që kanë kërkuar të emërohen apo zgjidhen në poste publike, sipas Autoritetit për të Drejtën e Informimit mbi Dokumentet e ish Sigurimit të Shtetit rezultojnë ish bashkëpunëtor.
“Në total, që nga krijimi në 2017 e në mbyllje të vitit të pestë të punës, janë verifikuar gjithsej 2.189 kandidatë përpara emërimit / ngritjes në detyrë, si edhe kandidatë për t’u zgjedhur deputetë e kryetarë bashkish, ku 2.118 rezultojnë pa dokumente, ndërsa 71 kandidatë me dokumente të ish-Sigurimit të Shtetit.”
Në raportin për vitin 2021 që i ka dërguar Kuvendit Autoriteti saktëson se bëhet fjalë për bashkëpunëtor, ish punonjës të strukturave të ish- Sigurimit ose anëtarë trupi gjykues në procese politike. Ata kanë kërkuar të punësohen në administratë, sistemin e drejtësisë, apo polici.
Ndër 578 kandidatë që synonin organet e vettingut në drejtësi 13 kanë rezultuar me dosje ndërsa nga verifikimi I 94 kandidatëve për procesin e vettingut në polici 6 kishin dokumente të ish Sigurimit të Shtetit.
Nga ana tjetër është Departamenti Amerikan I Shtetit që I tërhoqi vëmendjen qeverisë se nuk ka bërë përparim për kompensimin e ish të përndjekurve politik.
“Qeveria nuk ka bërë përparim në lëvrimin e kompensimeve për ish-të përndjekurit politik gjatë vitit. Instituti për Aktivizëm dhe Ndryshime Sociale dhe Autoriteti për Informim mbi Dosjet e Ish-Sigurimit të Shtetit (Sigurimi) ngritën shqetësime në lidhje me rastet e pazgjidhura të personave të zhdukur që datojnë nga ish-regjimi komunist”
Raporti i DASH u publikua më 12 prill nga Zëri i Amerikës.