Sekretari i Përgjithshëm i Partisë së Lirisë, Tedi Blushi ka reaguar pas deklaratave të kryeministrit Edi Rama në Korçë me fermerët për mollët, e produktet e tjera të mbjella që hidhen dhe nuk përdoren. Ai publikoi prononcimet e fermerëve korçarë, të cilët deklaruan se po falimentojnë dhe do presin drurët frutorë pasi nuk mund të mbulojnë kostot.
”Edi Rama nga Korça edhe sot u tall me fermerët duke premtuar mrekulli, kur në fakt ka pasur dhjetë vite kohë për të ndryshuar këtë realitet të dhembshëm që vetë fermerët e pohojnë me gojën e tyre. Fermerët hedhin prodhimet në kanal, kurse Edi Rama u kërkon të jenë shumë të lumtur. Shqipëria është në një gjendje emergjence. Shteti ka rënë në çdo aspekt dhe ka falimentuar, pikërisht për faj të Edi Ramës që në 10 vjet bëri eksperimente me shqiptarët”, tha Blushi.