Përgatitjet për sezonin e ri futbollistik vijojnë te skuadra matjane, ndërsa tekniku Samuel Nikaj po punon për të kolauduar grupin që do të përfaqësojë Burrelin në sezonin e ri të Kategorisë së Parë.
Që prej nisjes së përgatitjeve më 15 korrik, Nikaj nuk është mjaftuar vetëm me seancat stërvitore, por ka zhvilluar edhe disa ndeshje miqësore, duke testuar futbollistë të ndryshëm dhe duke i dhënë mundësi të gjithë grupit të tregojë vlerat e tij.
Në miqësoren e fundit, Burreli triumfoi 4-2 ndaj Korabit. Për vendasit shënuan Krasniqi, Xhabrahimi dhe Rrapaj, autor i dy golave.
Gjatë kësaj sfide, tekniku Nikaj aktivizoi rreth 30 futbollistë të grumbulluar, në një tjetër provë për të evidentuar lojtarët që do të jenë pjesë e skuadrës në kampionat. Formacioni i parë tregoi cilësi dhe efikasitet, duke shënuar katër gola, ndërsa në fund të takimit Korabi arriti të shënojë dy herë.
Rezultati u ndikua edhe nga fakti që Burreli luajti me dhjetë futbollistë pas ndëshkimit me karton të kuq të një prej lojtarëve, ndërkohë që në fushë ishte aktivizuar edhe formacioni i tretë.
Deri më 5 shtator, datë kur nis kampionati i Kategorisë së Parë, matjanët pritet të zhvillojnë edhe disa ndeshje të tjera miqësore. Këto sfida do t’i shërbejnë stafit teknik për të bërë zgjedhjet përfundimtare dhe për të kolauduar skuadrën që do të përfaqësojë Burrelin në sezonin e ri.
