Presidenti rus Vladimir Putin dhe ai francez Emmanuel Macron kanë zhvilluar një bisedë telefonike ditën e sotme. Nga sa mësohet, Putin ka lëshuar akuza ndaj “radikalëve” ukrainas për incidentin e datës 3 mars në termocentralin bërthamor “Zaporizhzhia” në Ukrainë.
Kremlini zyrtar bën me dije se Vladimir Putin i tha homologut të tij francez Emmanuel Macron se Ukraina ishte “përgjegjëse për provokimin” rreth termocentralit bërthamor Zaporizhzhia.
Telefonata mes dy liderëve zgjati rreth një orë e 45 minuta dhe ata diskutuan mbi pushtimin rus në Ukrainë.
Sulmi rus në qytetin juglindor të Enerhodar dhe centralin e tij bërthamor në Zaporizhzhia (i cili është më i madhi në Evropë), shkaktoi një zjarr të madh që tërhoqi vëmendjen e menjëhershme të liderëve botërorë, me ministrat e jashtëm të BE-së dhe NATO-s që po shqyrtojnë sanksione të reja.
Sipas mbikëqyrësit atomik të OKB-së, nuk u lëshua asnjë material radioaktiv.