Një incident i rëndë është regjistruar mbrëmjen e sotme në Komisionin Zonal të Administrimit Zgjedhor (KZAZ) nr.16 në Mat, ku debatet mes komisionerëve të Partisë Demokratike dhe Partisë Socialiste kanë degjeneruar në kërcënime serioze.
Sipas burimeve nga vendngjarja, gjithçka ka nisur në momentin kur komisionerët e PS-së kanë kërkuar verifikimin e saktësisë së firmave në listat e zgjedhësve që mbështesin kandidatët e pavarur.
Komisioneri socialist Eduart Abazi, me profesion jurist, është shprehur se kërkesa bazohej në dispozitat e Kodit Zgjedhor, që parashikon kontrollin e këtyre listave përpara miratimit.
Në këtë moment, komisioneri i PD-së Halil Lleshi ka kundërshtuar ashpër kërkesën, duke deklaruar se verifikimi nuk do të kryhej. Debati verbal është përshkallëzuar, dhe sipas dëshmitarëve, Lleshi ka kërcënuar Abazin me fjalët: “Unë ta pres kokën!”
Për shkak të tensionit të lartë, komisionerët e PS-së Kastriot Panavija, Kujtim Kurti, Eduart Abazi dhe sekretarja Ola Sinani janë detyruar të largohen nga ambientet e KZAZ-së.
Pas incidentit, mësohet se Eduart Abazi do t’i drejtohet organeve të drejtësisë, duke kërkuar ndëshkimin e autorit për kërcënimin e bërë gjatë ushtrimit të detyrës zyrtare.