Vijon situata e tensionuar në veriun e Kosovës. Në Zveçan, është sulmuar me gurë ekipi i ATV-së, ndërsa ishin duke përcjellë zhvillimet e fundit në këtë komunë.Në komunikatën e Asociacionit të Gazetarëve bëhet e ditur se sipas medias në fjalë, disa persona të maskuar, e kanë sulmuar me gurë veturën teksa ishte në lëvizje, e për pasojë kanë marrë lëndime të lehta trupore gazetari Fatlum Jashari dhe kameramani Blend Thaçi, si dhe janë thyer xhamat e automjetit.
Asociacioni i Gazetarëve të Kosovës vazhdon të jetë i shqetësuar për ekipet e medieve që po raportojnë nga veriu i vendit, ndaj ato u bëjnë thirrje Policisë së Kosovës, dhe prezencës ndërkombëtare atje të krijojnë kushte më të mira për ta.
Prej disa ditësh tashmë, protestuesit serbë po kundërshtojnë hyrjen e kryetarëve shqiptarë në ndërtesat komunale në Zveçan, Leposaviq dhe në Zubin Potok. Si pasojë e protestave të dhunshme, janë plagosur gjashtë policë të Kosovës dhe mbi 30 ushtarë të KFOR-it, ndërkohë që serbët kanë sulmuar edhe gazetarët.