Një ngjarje e rëndë është regjistruar mesditën e kësaj të shtune në një lokal të frekuentuar në qytetin e Elbasanit, ku dyshohet se një person ka tentuar të vrasë me armë zjarri një tjetër.
Ngjarja ka ndodhur rreth orës 14:50, duke shkaktuar panik te personat që ndodheshin në ambientet e lokalit.
Sipas të dhënave paraprake, personi i dyshuar, i cili raportohet se ka precedentë penalë, është afruar pranë një tjetër personi dhe ka nxjerrë armën e zjarrit, duke ia drejtuar në drejtim të tij.
Ende nuk është e qartë nëse është qëlluar me armë apo tentativa është parandaluar përpara se të ndodhte qitja. Deri më tani nuk raportohet për persona të plagosur.
Pas marrjes së informacionit, policia ka nisur hetimet dhe ka identifikuar personin e dyshuar si autor. Forcat e rendit po punojnë për lokalizimin dhe kapjen e tij.
Ndërkohë, grupi hetimor po mbledh prova dhe dëshmi për të zbardhur dinamikën e plotë të ngjarjes, si dhe rrethanat që i paraprinë incidentit.
Motivi mbetet ende i paqartë, ndërsa po verifikohet nëse ngjarja ka ardhur si pasojë e një konflikti të mëparshëm mes personave të përfshirë.
Policia pritet të japë informacion zyrtar në vijim lidhur me rrethanat e ngjarjes dhe veprimet e ndërmarra ndaj personit të dyshuar.