Policia e Shkodrës ka arrestuar dy vite pas ngjarjes autorin e plagosjes së Nelson Hysës, më 14 prill 2017.
Ish-boksieri i Vllaznisë nuk është një emër i panjohur për policinë, pasi në mars të këtij viti u arrestua si pjestar i grupit “Bajri”.
Sipas policisë së Shkodrës është vënë në pranga Valter Ksolla, pasi Gjykata e Shkallës së Parë Shkodër, ka caktuar masën e sigurisë “Arrest në burg”, për veprat penale të “Vrasjes me paramendim, e kryer në bashkëpunim” mbetur në tentative, dhe “Prodhimi e mbajtje pa leje e armëve dhe municioneve luftarake”.
Gjithashtu si rezultat i këtij operacioni u arrestuan në flagrancë dy vëllezërit Ndue Ksolla, 32 vjeç dhe Kol Ksolla, 25 vjeç, banues në fshatin Grudë e Re, për përkrahje të autorit të krimit, “Prodhimi e mbajtja pa leje e armeve dhe municioneve luftarake” dhe “Kanosja”.
Ata dyshohet se përveçse kanë përkrahur Valter Ksollën, dyshohet se me 14 prill të këtij viti kanë qëlluar me armë zjarri në drejtim të banesës së L. A., 50 vjeç, banues në fshatin Grudë e Re, Shkodër.
Lexo edhe: Rezultoi pjesë e grupit “Bajri”, e shkuara e kampionit të boksit
Vetë ish boksieri Nelson Hysa, u arrestuar më 10 mars në zonën e Komunës së Parisit në Tiranë ku kishte marrë një apartament me qira. Ai është vënë në pranga në kuadër të operacionit “OAZ”, i dyshuar si pjestar i grupit “Bajri”.
Mbi të rëndojnë një sërë akuzash si “Organizata kriminale, “Kryerja e veprave penale nga organizata kriminale” dhe “Grupi i strukturuar kriminal”, “Paracaktimi i rezultateve në garat sportive, e kryer në bashkëpunim”, për qëllime të fitimit pasuror.
NGJARJA E DY VITEVE ME PARE
Dy vite më parë, ish boksieri i Vllaznisë Nelson Hysa u qëllua dy herë me armë zjarri pistoletë, ku mbeti i plagosur. Autorët kanë ruajtur lëvizjet e tij dhe sapo ka dalë nga berberi e kanë qëlluar.
Në atë kohë u raportua se ishin dy persona me skafandër që qëlluan në drejtim të tij, ndërsa po lëviznin me një motor dhe menjëherë pas ngjarjes janë larguar në drejtim të paditur.