Të paktën 15 persona kanë humbur jetën dhe 129 të tjerë janë plagosur, pasi një tërmet i fuqishëm me magnitudë 7.8 ballë goditi jugun e Filipineve në orët e para të mëngjesit të së hënës.
Tërmeti goditi brigjet pranë qytetit General Santos në ishullin Mindanao, ndërsa Instituti Filipinez i Vullkanologjisë dhe Sizmologjisë njoftoi se lëkundja kishte një thellësi prej 10 kilometrash, duke e bërë atë veçanërisht të fortë dhe të ndjeshëm në sipërfaqe.
Pas tërmetit, disa vende të rajonit, përfshirë Filipinet, Indonezinë dhe Japoninë, lëshuan paralajmërime për cunami nga frika e valëve të mëdha detare. Megjithatë, shumica e këtyre paralajmërimeve janë hequr më vonë, pasi rreziku u vlerësua si i kufizuar.
Ekipet e emergjencës janë angazhuar në zonat e prekura për të kërkuar të mbijetuar, për të ofruar ndihmë mjekësore dhe për të vlerësuar dëmet materiale të shkaktuara nga tërmeti.
Presidenti i Filipineve, Ferdinand Marcos Jr., deklaroi se ka urdhëruar të gjitha agjencitë përkatëse qeveritare të reagojnë menjëherë ndaj situatës. Ai u bëri thirrje banorëve të zonave bregdetare dhe atyre të rrezikuara të zhvendosen në vende më të larta si masë paraprake sigurie.
Autoritetet paralajmërojnë se mund të ketë pasgoditje në orët dhe ditët në vijim, ndërsa bilanci i viktimave dhe i të plagosurve mund të ndryshojë me vazhdimin e operacioneve të kërkim-shpëtimit.