Emiratet e Bashkuara Arabe i janë bashkuar nismës së vendeve që kanë kontribuar me mjete logjistike apo ekipe në vendin tonë, pas tërmetit të 26 nëntorit.
Të premten mbërriti në Shqipëri një cargo nga Emiratet e Bashkuara me ndima logjistike prej 460 çadra familjare dimërore për të lehtësuar sado pak vështirësitë e hasura në vend, nga tërmeti që goditi vendin tonë me 26 nentor.
Në Rinas, avioni u prit nga drejtori i Agjencisë së Mbrojtjes civile Haki Çako, i cili falenderoi perfaqësuesit nga Emiratet e Bashkuara per gatishmërinë dhe ndihmën e ofruar.
Mjaft shtete të tjera kanë shprehur solidaritet të menjehërshëm me Shqipërinë në këto ditë. Kosova ishte ndër të parat që u angazhua në operacionet e kërkim shpëtimit, qeveria akordoi 100 mijë euro ndihmë financiare si dhe kamionë me ndihma në ushqime veshmbathje dhe batanije.
SHBA ka sjellë një numër ekspertësh. Bashkimi Evropian njoftoi një ndihmë prej 15 milionë eurosh. Turqia është angazhuar të ndërtojë rrreth 500 shtëpi, veç ndihmave të tjera. Republika e Austrisë do të ndihmojë qeverinë shqiptare në përballimin e pasojave të tërmetit të datës 26 nëntor 2019, duke vënë në dispozicion 600,000 €, për rindërtimin e banesave të shkatërruara apo dëmtuara.
Ndërsa së fundmi Rumania krahas ekipit të ķërkim – shpëtimit solli edhe ndihma humanitare me dy kamionë nga Administrata Kombëtare e Rezervave të Shtetit dhe Probleme të Veçanta.
