Të gjithë tatimpaguesit persona fizikë/juridikë, përfshirë edhe organizatat jofitimprurëse, kanë edhe 1 muaj afat për të hapur llogari bankare biznesi, në të kundërt do të përballen me gjoba. Ligji përcakton se afati përfundimtar është 26 Tetori, ndërkohë sipas tatimeve, subjekte që kanë këtë detyrim janë: tatimpaguesit persona fizikë tregtarë, të regjistruar për tatimin mbi vlerën e shtuar; tatimpaguesit persona juridikë, pavarësisht nga qarkullimi që realizojnë; organizatat jofitimprurëse të regjistruara në organin tatimor. Përpos hapjes së llogarive, subjektet janë të detyruara ti deklarojnë në administratën tatimore.
Tatimet bëjnë me dije se prej datës 15 Tetor këto të dhëna do të mund t’i dorëzojnë, duke i plotësuar në llogarinë tuaj të deklarimit elektronik në E-filing. Tatimpaguesit e rinj janë të detyruar të hapin llogarinë bankare të biznesit/organizatës jo më vonë se 20 ditë kalendarike nga e nesërmja e regjistrimit në Qendrën Kombëtare të Biznesit dhe ta deklarojnë atë në të njëjtën mënyrë në Administratën Tatimore.
Ndërkaq, përjashtohen nga detyrimi për të hapur dhe deklaruar të dhënat e llogarisë bankare në Administratën Tatimore, vetëm personat fizikë tregtarë, aktualisht të regjistruar, të cilët nuk janë të regjistruar për tatimin mbi vlerën e shtuar. Në rast se këto subjekte, regjistrohen për Tatimin mbi Vlerën e Shtuar në një moment të dytë, atëherë kanë detyrimin të hapin dhe deklarojnë llogarinë bankare në Administratën Tatimore. Gjobat në rast të mospërmbushjes së afateve, variojnë nga 50 deri në 100 mijë lekë.