Shoqata e dyqaneve tregtare (ACS) ka kërkuar më shumë mbështetje financiare për bizneset e vogla në Britaninë e Madhe. Sipas ACS mijëra dyqane të vogla do të detyrohen të mbyllen për shkak të rritjes së kostove të energjisë nëse qeveria nuk ndërhyn me mbështetje emergjente ekonomike. Kërkesa i është dërguar përmes një letre Kancelarit të Thesarit, Nadhim Zahawi.
Shoqata e dyqaneve tregtare përfaqëson 48mijë dyqane që punësojnë rreth 405 mijë vetë staf. Shoqata thotë se faturat e energjisë kanë pësuar një rritje dyfishe në muajt e fundit.
“Qeveria duhet të kuptojë se kjo është një emergjencë. Mijëra dyqane komoditeti do të detyrohen të marrin vendime jashtëzakonisht të vështira përballë dhjetëra mijëra paund kosto shtesë të energjisë në muajt e ardhshëm, të cilat në rastin më të mirë do të përfshijnë investime të anuluara, ulje të orarit të stafit dhe rritje të çmimeve në dyqane, duke rritur inflacionin edhe më tej. Për disa, megjithatë, kostoja e energjisë do ta bëjë biznesin të paqëndrueshëm, dhe kështu ata do të detyrohen të mbyllen nëse nuk ndërmerren veprime për të ofruar mbështetje kuptimplotë”, thuhet në letër.