Dyshimet që qarkullonin prej kohësh tashmë kanë marrë një tjetër dimension, pasi dokumente të vitit 2020 të siguruara nga gazeta britanike “The Guardian” zbulojnë një marrëveshje paraprake për krijimin e një “FIFA Super League”.
Projekti u bë publik në prill të vitit 2021, kur 12 klube të mëdha evropiane njoftuan krijimin e një kompeticioni të pavarur. Nisma dështoi brenda pak orësh pas reagimeve të forta nga tifozët, institucionet politike dhe futbolli evropian.
Në atë kohë, presidenti i FIFA-s, Gianni Infantino, mbështeti qëndrimin e kreut të UEFA-s, Aleksander Ceferin, duke kundërshtuar krijimin e një lige të mbyllur jashtë strukturave ekzistuese të futbollit.
“E refuzojmë në mënyrë kategorike krijimin e Super League, që është një ligë e mbyllur e ndarë nga institucionet aktuale, kampionatet, federatat, UEFA dhe FIFA”, deklaronte Infantino në atë periudhë.
Megjithatë, sipas dokumenteve të publikuara nga “The Guardian”, disa muaj më herët Infantino ishte përfshirë në diskutime për një projekt të ngjashëm, ku FIFA do të kishte rol qendror.
Në dokumente, FIFA identifikohet me kodin “W01”, një shenjë që përdorej edhe nga ushtria britanike për një zyrtar të nivelit të lartë. Sipas marrëveshjes paraprake, partneriteti mes FIFA-s dhe Super League do të zgjaste të paktën 12 vjet dhe do të parashikonte krijimin e një kompanie të përbashkët për menaxhimin e operacioneve komerciale të “FIFA Super League” dhe një formati të zgjeruar të Botërorit të Klubeve.
Plani parashikonte një kompeticion edhe për futbollin e femrave, me 15 klube anëtare të përhershme dhe 5 ekipe që do të kualifikoheshin përmes turneve ekzistuese.
Sipas dokumenteve, FIFA do të kishte një rol të privilegjuar aksionar, duke pasur ndikim vendimtar në ndryshimet e formatit, kalendarit, shpërndarjen e fondeve dhe emërimin e drejtuesit ekzekutiv.
Diskutimet përfshinin gjithashtu reduktimin e dritareve për ndeshjet e kombëtareve në dy periudha dyjavore në vit dhe ndryshime në numrin e skuadrave pjesëmarrëse në kampionatet kombëtare. Kjo do t’i jepte FIFA-s një rol më të madh në riorganizimin e strukturës së futbollit botëror.
“The Guardian” raporton se Infantino ishte ndër zyrtarët e FIFA-s të përfshirë në këtë projekt dhe se ishte në dijeni të zhvillimit të negociatave. Nuk është e qartë pse ideja nuk kaloi përtej marrëveshjes paraprake, ndërsa burime të cituara nga gazeta britanike thanë se Infantino më vonë u kishte kërkuar bashkëpunëtorëve të tij të mos punonin kundër institucioneve ekzistuese të futbollit.
Zbulimet e fundit kanë shtuar debatet rreth rolit të Infantinos dhe përpjekjeve të tij për të ndryshuar strukturën tradicionale të futbollit ndërkombëtar dhe për të zgjeruar ndikimin e FIFA-s.
Në këtë kuadër është përmendur edhe ideja e shitjes së një pjese të të drejtave komerciale të FIFA-s te investitorët privatë. FIFA, e cila ka siguruar miliarda dollarë të ardhura nga cikli 2022–2026 dhe disponon rezerva të konsiderueshme financiare, po shqyrton mundësi të reja për financim, por kritikët argumentojnë se një marrëveshje e tillë mund të përfitojë më shumë investitorët privatë sesa vetë organizata.