Izraeli dhe Irani kanë shkëmbyer më shumë sulme ndaj njëri-tjetrit, ndërsa konflikti trejavor sa vjen e thellohet.
Pa dhënë shumë detaje, ushtria izraelite tha se shënjestroi infrastrukturën e regjimit në Teheran, ndërsa Republika Islamike feston Novruzin ose Vitin e Ri Persian.
Gjatë natës, edhe Irani lëshoi disa breshëri raketash ndaj Izraelit. Sirenat e alarmit dhe zhurma të forta të përplasjeve në ajër u dëgjuan në të gjithë vendin.
Sulmet e fundit vijnë pasi Teherani shënjestroi një rafineri nafte izraelite, ndërsa presidenti Trump paralajmëroi Izraelin të ndalonte bombardimet e mëtejshme ndaj infrastrukturës energjetike.
Në një deklaratë për media, kryeministri Netanyahu përsëriti se Izraeli e kreu i vetëm sulmin ndaj fushës Pars, ndërsa tha se ushtria do të vepronte sipas asaj që Trump kishte kërkuar.
“Presidenti Trump na kërkoi të ndalojmë sulmet e ardhshme dhe ne po i ndalojmë”, tha Benjamin Netanyahu, kryeministër i Izraelit.
Emiratet e Bashkuara Arabe, Kuvajti, Arabia Saudite dhe Bahreini kanë raportuar të gjitha sulme me raketa dhe dronë këtë të premte, për të cilat bëjnë përgjegjës Iranin.
Sipas një raporti të medias amerikane Axios, administrata Trump po shqyrton edhe pushtimin ose bllokimin e ishullit Kharg të Iranit për të ushtruar presion mbi Iranin që të rihapë ngushticën e tranzitit të karburanteve.
Ndërkohë, agjencia e lajmeve të aktivistëve të të drejtave të njeriut Hrana ka përditësuar të dhënat për viktimat në Iran. Sipas kësaj agjencie, numri i personave të vdekur që nga fillimi i luftës më 28 shkurt ka shkuar në 3,186.