Ndërsa të gjithë segmentët e tregut të apartamenteve kanë shënuar rritje të fortë gjatë këtij viti, çmimet në bregdet po kalojnë përtej çdo pritshmërie. Një sondazh i realizuar nga Banka e Shqipërisë me një kampion që përmbante 230 shoqëri ndërtimi dhe agjentësh të tregtimit të pasurive të paluajtshme zbardh se tregu vijon të tregojë një kërkesë shumë të lartë, e cila pritet të mbetet e tillë edhe për dy vitet e ardhëshme.
Vëllimet e shitjeve të raportuara kanë shënuar rritje në të gjitha zonat e vendit; rritja e vëllimeve të shitjes, e kombinuar me rritjen e çmimit në përgjithësi në të gjithë vendin, kanë ndikuar në rritjen e vlerës së indeksit të ccmimeve në përgjithësi.
Indeksi i Çmimit për Tiranën paraqet ecuri të ngjashme me indeksin e përgjithshëm. Indeksi për Tiranën u rrit me 28.5% ndaj periudhës paraardhëse dhe me 39.5% në terma vjetorë. Çmimet mesatare për pronat e shitura në qendër dhe periferi të kryeqytetit janë rritur ndjeshëm me përkatësisht +33% dhe +40% në krahasim me çmimet e periudhës paraardhëse, ndërkohë që çmimet për pronat e shitura jashtë qytetit ishin rreth 6% më pak se niveli mesatar i periudhës së kaluar. Për çmimet për pronat e shitura në qytetet bregdetare, agjentët raportuan çmime mesatare më të larta (me rreth 60%), ndërsa çmimet mesatare në “Zonat e Tjera” u rritën me 20%. Gjatë gjysmës së parë të vitit, numri i pronave të shitura në “Zonat e tjera” është rritur ndjeshëm në krahasim me gjashtëmujorin dhe periudhat e mëparshme.
Situatë që pritet të mbetet e njëjtë edhe në vijim. Agjentët kanë dhënë përgjigje optimiste për gjendjen e përgjithshme në tregun e pasurive të paluajtshme në të gjithë territorin e vendit për horizontin afatshkurtër (gjashtëmujori në vazhdim), dhe janë gjithashtu optimistë për afatin e gjatë (gjatë dy viteve të ardhshme). Balanca neto e përgjigjeve për pyetjen mbi të ardhmen afatmesme mbetet pozitive dhe ka vlerë më të lartë sesa mesatarja afatgjatë.