Rita Ora elektrizoi skenën e madhe në Tiranë, ku shkëlqeu me performancën e saj. Së fundmi, “Daily Mail” i ka kushtuar një artikull këngëtares me famë botërore. “Daily Mail” shkruan për prejardhjen e Ritës, duke theksuar se ajo konsideron Tiranën, kryeqytetin e Shqipërisë, si shtëpinë e saj si edhe Prishtinën. Gjithashtu edhe veshja e saj u komentua, ku media prestigjioze shkroi se veshja e Ritës ishte rrëzëllitëse e plot shkëlqim.
U përmend edhe fakti i momentit kur ajo ngriti me emocion flamurin shqiptar. Rita këndoi këngët e saj hit si: “Your Song” , “Hot Right Now”, “Lonely Together” apo “Anywhere”. Gjithashtu, Rita u nderua edhe nga presidenti i vendit, Bajram Begaj.
“Ka disa gjëra në jetë që nuk i harroni kurrë, ky udhëtim do të jetë një prej tyre. Sot ka qenë një ditë joreal. Kam pasur nderin e madh që m’u dha titullin “Naim Frashëri” nga Presidenti i Shqipërisë, Bajram Begaj”, tha ajo.
Së fundmi, mamaja e këngëtares, Vera Ora, ka dhënë një intervistë për “Euronews Albania”, ku u ndal te karriera e së bijës.
“Rita bën shumë performanca dhe secila është shumë interesante, por në Shqipëri është speciale për ne si familje edhe për Ritën sepse ajo e din që është në një vend që njerëzit e duan dhe e ka atë sinqeritetin që të shprehet shumë më lehtë dhe e ndjen afërsinë, kjo performancë ka qenë shumë eksplozive dhe me energjinë e saj”, filloi Vera.
“E morën në një prezantim të shkollës për festën e Krishtlindjeve dhe kishte marr një rol kryesor në këndimin në shfaqje. Unë e kam pasur djalin shumë të vogël, 6 muajsh dhe kur ikëm atje i them bashkëshortit ‘Besnik kjo këndon shumë mirë’. Unë u befasova”, vijoi më tej.