Pas shumë tratativash, Tirana ia ka dalë të rikthejë gjigantin anglez, Michael Ngoo, i cili “bisha” e sulmit të saj gjatë sezonit kur u shpall kampione për herë të fundit (2019-202).
Një goditje e madhe në merkato e bardhebluve, teksa vlerat e shtatlartit njihen më së miri nga të gjithë. Kuptohet, trajneri Orges Shehi do të ketë nevojë për pak takt për ta menaxhuar, sepse anglezi është karakter shpërthyes në fushë dhe i vështirë për frymën e grupit.
Ja njoftimi i klubit kryeqytetas me këtë rast:
“Lojtari Michael Ngoo rikthehet në Shqipëri për t’ju bashkuar skuadrës bardheblu. Një nga sulmuesit më të dashur për tifozët dhe jo vetëm do të jetë serish pjesë e kampionatit shqiptar.
Shtatlarti ishte titullar i padiskutuar në sezonin 2019-2020 dhe me kontributin e tij të madh në skuadër i dhuroi klubit titullin kampion. Ngoo vjen sërish me synime të qarta dhe objektivin kryesor, fitimin e një titulli tjetër.
Ai do t’i bashkohet skuadrës në Pogradec për të vijuar fazën përgatitore. Mirëseerdhe në familjen tënde, Michael!”