Të paktën dy persona kanë vdekur pasi dy avionë të vegjël u përplasën në ajër pranë një aeroporti në Arizona, njoftoi policia vendase.
Avionët ‘Cessna 172S’ dhe një ‘Lancair 360 MK II’, kishin nga dy pasagjerë secili në bord kur u përplasën në Aeroportin Rajonal Marana, në veri-perëndim të Tucson, tha Bordi Kombëtar i Sigurisë së Transportit.
Bordi i cili drejton hetimin për incidentin, tha në rrjetin “X” se bazuar në informacionet paraprake, avioni “u përplas ndërsa ishte kundër erës së pistës 12”, e cila është një nga dy pistat në aeroport.
Ai shtoi se Cessna “u ul pa ndonjë incident” ndërsa Lancair “preku terrenin pranë pistës 3 dhe pasoi një zjarr pas përplasjes”.
Ende nuk është dhënë asnjë informacion për viktimat. Administrata Federale e Aviacionit (FAA) tha se dy avionët u përplasën rreth orës 08:25 me orën lokale të mërkurën.
Aeroporti Rajonal Marana është një “fushë e pakontrolluar”, që do të thotë se nuk ka një kullë operative të kontrollit të trafikut ajror. Pilotët shpesh përdorin një Frekuencë Këshillimore të Përbashkët të Trafikut për të njoftuar pozicionin e tyre pilotëve të tjerë që janë në afërsi të aeroportit.
Përplasja vdekjeprurëse pason një varg incidentesh të fundit të lidhura me aviacionin.
Kjo ngjarje vjen pasi sektori i aviacionit amerikan i bëri thirrje Kongresit të mërkurën për financim urgjent për teknologjinë dhe personelin e kontrollit të trafikut ajror.