Një fëmijë nëntë vjeçar, i mbyllur në një dhomë të errët prej dy metrash katrorë, ndoshta prej muajsh, u zbulua nga policia belge, në Marcinel të qytetit Charleroi.
Këtë e ka bërë të ditur sot prokuroria publike në Charleroi, duke theksuar se fëmija mund të jetë mbyllur me javë, ndoshta edhe muaj. Për këto kushte tronditëse paraburgimi u fajësuan nëna dhe njerku i fëmijës dhe për ta u lëshua një urdhër arresti.
Sipas raporteve të mediave belge, autoritetet belge zbuluan fëmijën nëntë vjeçar në shtëpinë e familjes në Marsinel të mërkurën e kaluar pas një ankese. Aty fëmija jetonte në kushte të mjerueshme . “Ishte në një hapësirë shumë të vogël, dy metra katrorë. Ishte mbyllur atje, në errësirë për javë, madje edhe muaj. Fëmija lejohej të dilte vetëm për të ngrënë pak bukë të thekur. Ai nuk tregoi shenja të kequshqyerjes apo lëndime fizike të lidhura me rrahjet. Do të kryhen teste më gjithëpërfshirëse për të vlerësuar në thellësi gjendjen e tij shëndetësore”, komentoi sot paradite zyra e prokurorit të Charleroi.
Nëna dhe njerku i fëmijës që u arrestuan akuzohen për rrëmbim, privim nga ushqimi, rrahje dhe plagë dhe trajtim çnjerëzor dhe poshtërues. Dy të pandehurit do të dalin në ditët në vijim para gjykatës së Charleroi, e cila do të vendosë nëse do të qëndrojnë apo jo në paraburgim.