Drejtuesja politike e PD-së për Diasporën, Jozefina Topalli ka komentuar mënyrën e arrestimit të ish-Presidentit Ilir Meta. Gjatë intervistës për Klan News, Topalli është shprehur se mënyra se si është arrestuar Meta është një turp për shoqërinë tonë dhe një shfaqje e shëmtuar.
Besard Jacaj: Më 21 Tetor u arrestua ish-Presidenti, ish-Kryeministri dhe ish-Kryetari i Kuvendit, Ilir Meta, ju çfarë ndjesie kishit kur patë atë moment të arrestimit?
Jozefina Topalli: Mënyra e arrestimit është një turp për shoqërinë tonë. Është gjëja më e shëmtuar mënyra e arrestimit. Unë jam për një luftë të ashpër kundër korrupsionit, por jo me seleksionim dhe jo me targetim politik, por mënyra si është arrestuar, ajo ndodh në vende si Ekuadori, vende që ka kartele droge… Është një shfaqje e shëmtuar.
Topalli ka komentuar edhe arrestimin e Berishës për rreth 1 vit teksa thotë se ta mbash ish-Kryeministrin nën arrest pa asnjë akuzë për 333 ditë është një njollë e kësaj periudhe.
Jozefina Topalli: Por kam edhe një gjë tjetër. Ne si Shqipëri kemi një histori të dhimbshme. Ne të gjithë firmëtarët e pavarësisë i kemi, ose të pushkatuar, ose të arrestuar. Në ditët e sotme si një vend i NATO-s, të arrestosh ish-Kryeministrin, ish-Presidentin pa akuzë dhe ta mbash nën arrest për 333 ditë siç ka ndodhur me rastin e Berishës, është një njollë e kësaj periudhe.