Ish-kryetarja e Parlamentit, Jozefina Topalli, ka folur sonte “Në Kurthin e Piter Pan” për incidentin e javës së kaluar në parlament, ku nënkryetari i PD, Edi Paloka sulmoi me bojë Kryeministrin Edi Rama.
Topalli tha se në parlament nuk thuhen fjalë të papranueshme dhe nuk bëhen gjeste të papranueshme.
Njëri nga fëmijët e pyeti ish kryetaren e Kuvendit: Një burrë i kishte hedhur Edi Ramës bojë, ishte një gjë e mirë kjo, apo e keqe?
Jozefina Topalli në përgjigjen e saj nënvizoi: “…unë jam e bindur që në parlamentin e fëmijëve këtu nuk ndodhin kurrë gjëra të tilla. Asnjëri nuk dëshiron që as të dëgjojë ndonjë fjalë jo të mirë dhe as të shikojë diçka të papëlqyer. Dhe nuk besoj se ne parlamentin tuaj ndodh diçka e tillë, asnjë herë. Parlamenti është tempulli i demokracisë, dhe në tempull nuk thuhen fjalë të papranueshme dhe nuk bëhen gjeste të papranueshme”.
Ndërkohë Topalli është kritikuar fort nga mazhoranca aktuale për sjelljen e saj në Kuvendin e Shqipërisë, madje herë pas here mediat ritransmetojnë deklaratat e forta të ish kryeparlamentares: “kape për zheles, nxirre jashtë”