Topi me të cilin Diego Armando Maradona shënoi golin e tij të famshëm “Dora e Zotit” në Kupën e Botës të vitit 1986 u shit në ankand për gati 2.4 milionë euro.
Topin “Adidas” e kishte në pronësi prej 36 vitesh, Ali Bin Nasser, ish-zyrtari tunizian që arbitroi ndeshjen çerekfinale mes Argjentinës dhe Anglisë në Meksikë.
Bin Nasser tha përpara ankandit se ai mendonte se ishte koha e duhur për të ndarë artikullin me botën dhe shprehu shpresën se blerësi do ta vendoste atë në muze publik.
Goli i Maradonës që i dha Argjentinës epërsinë 1-0 në atë ndeshje kundër Anglisë, por që duhej të anulohej, është bërë pjesë e legjendës së futbollit. Maradona më vonë bëri shaka duke thënë se kishte shënuar “pak me kokë dhe pak me dorën e Zotit”, duke bërë që sot e kësaj dite të njihet me këtë emër.