Një gjykatë në Lahore ka dënuar me vdekje gjashtë persona të shpallur fajtorë për torturimin dhe djegien e drejtorit të një fabrike tekstile, të cilin e akuzuan për “blasfemi”. Qindra punëtorë të zemëruar në qytetin lindor pakistanez të Sialkot torturuan dhe dogjën Priyantha Kumaran, menaxheri i përgjithshëm i uzinës Rajco në Sri Lanka, dhjetorin e kaluar.
Sipas policisë, akuza për blasfemi, e cila iu drejtua nga turma, lidhej me heqjen e një posteri me tekste islamike. Në videot e marra me celularë, turma e ndjek viktimën në një çati dhe më pas sulmuesit e rrahin, e tërheqin zvarrë në rrugë, e zhveshin lakuriq dhe i vënë zjarrin. Autorët largojnë një burrë që tentoi ta ndihmonte.
Gjykata e Kundër Terrorizmit në Lahore, e cila u mblodh brenda një burgu të sigurisë së lartë, dënoi gjithashtu 7 nga të akuzuarit me burgim të përjetshëm, ndërsa 76 të tjerët janë dënuar me dy vite burg. Numri i përgjithshëm i të pandehurve ishte 89. Nëntë nga të pandehurit janë të mitur.
Megjithëse gjykatat pakistaneze vazhdojnë të vendosin dënimin me vdekje, ai rrallë zbatohet, pasi mund të shfuqizohet në bazë të reformave që promovohen dhe lidhen me një marrëveshje tregtare me Bashkimin Evropian.