Një zjarr i madh shpërtheu të martën në një kantier ndërtimi në Bruksel, në Kullën Oxy, një kompleks banimi në qendër të qytetit, rinovimi i të cilit kishte përfunduar së fundmi.
Sipas mediave të huaja, deri tani kanë humbur jetën 20 persona, ndërsa disa të tjerë rezultojnë ende të zhdukur. Autoritetet belge kanë bërë të ditur se operacioni i kërkim-shpëtimit vijon.
Një numër ende i pacaktuar trupash u gjetën në njërin prej dy ashensorëve të godinës, në sheshin qendror “Place de Brouckere”, ku zjarri shpërtheu në orët e para të mëngjesit. Një zëdhënës i inspektoratit të punës tha se ende nuk është konfirmuar nëse trupat i përkasin gjashtë punëtorëve që rezultojnë të zhdukur.
Sipas brigadës së zjarrfikësve, në momentin e shpërthimit të flakëve në kantier ndodheshin mbi 200 punëtorë.
Policia dhe autoritetet kompetente kanë nisur hetimet për të zbardhur shkaqet e zjarrit, ndërsa operacionet në vendngjarje vazhdojnë.