Pesë alpinistë kanë humbur jetën në malin Elbrus, maja më e lartë e Evropës, pasi u përfshinë nga një stuhi e fortë gjatë ngjitjes.
Sipas autoriteteve ruse, ekipet e shpëtimit kanë arritur të evakuojnë trupat e dy viktimave, të cilët ndodheshin në një lartësi prej 5,350 metrash. Më herët, dy alpinistë të tjerë u shpëtuan dhe u transportuan për ndihmë mjekësore.
Ndërkohë, trupat e tre viktimave të tjera janë lokalizuar, por ende nuk kanë mundur të evakuohen për shkak të kushteve të vështira atmosferike dhe erërave të forta që vijojnë në zonë.
Sipas mediave ruse, viktimat ishin shtetas të Bosnje dhe Hercegovinës, pjesë e një ekspedite prej shtatë personash nga qyteti i Zenicës. Në grup ndodheshin edhe një çift bashkëshortësh dhe një mjeke e spitalit lokal.
Mali Elbrus, me lartësi 5,642 metra, ndodhet në jug të Rusisë, pranë kufirit me Gjeorgjinë, dhe njihet për ndryshimet e papritura të motit, të cilat e bëjnë ngjitjen veçanërisht të rrezikshme.
Operacioni i kërkim-shpëtimit vijon, ndërsa autoritetet presin përmirësimin e kushteve atmosferike për të bërë të mundur evakuimin e trupave të mbetur.